CREMEL 2.0: AA Sortzaileari buruzko prestakuntza kultura- eta sormen-industrietako profesionalentzat2026 IRAILA
- Adimen Artifizial Sortzailea proiektuak sortzeko, ekoizteko eta kudeatzeko modua eraldatzen ari da. Testuinguru horretan, Basque District of Culture and Creativity-k (BDCC), CREMEL 2.0 proiektuaren esparruan, kultura- eta sormen- sektoreko profesionalei zuzendutako prestakuntza-programa bultzatzen du, AA beren jarduera profesionalean modu praktiko, kritiko eta estrategikoan txertatzea errazteko. CREMEL 2.0 Erasmus+ programaren bidez finantzatutako Europako proiektua da, eta kultura- eta sormen-industrien eraldaketa digitala eta adimen artifizialaren integrazio etikoa sustatzea du helburu. Euskadin, prestakuntza- programak teknologia horiek praktika profesionalera nola eraman aztertzen du, prestakuntza, aplikazioa eta adituen laguntza uztartuz.
-
Tresna ezagutzetik nola erabili jakitera
Programaren abiapuntua ideia nagusi bat da: AA txertatzea ez da soilik tresna berriak erabiltzen ikastea, baizik eta zer ekarpen egin dezaketen ulertzea, zein muga dituzten ezagutzea eta irizpidez erabiltzen jakitea. Horregatik, programak AA Sortzailearen oinarrietatik eta elkarrizketa-ereduekiko elkarreraginetik hasi, eta ohiko zeregin profesionaletan duten aplikaziora arteko gaiak lantzen ditu, hala nola idazketa, informazioaren laburpena, dokumentazioa, plangintza edo ideazioa. Helburua da parte-hartzaileek teknologia horiekin esperimentatzea eta, aldi berean, noiz, nola eta zertarako erabili erabakitzeko irizpide profesionala garatzea. -
Sormen-praktikari lotutako prestakuntza
Ibilbidea lau esparruren inguruan egituratzen da: oinarriak eta irizpideak, sormen areagotua, produktibitatea eta integrazioa. Programan zehar hainbat gai landuko dira, besteak beste, prompting-aren ingeniaritza, idazketa eta edizio lagundua, informazioaren analisia eta sintesia, narratiba eta storytelling-a, ideazio bisuala eta kontzeptuala edo AArekin elkarlanean egindako sormena. Kultura- eta sormen-sektorerako bereziki garrantzitsuak diren beste alderdi batzuek ere lekua izango dute, hala nola egiletzak, arriskuak, mugak eta jardunbide egokiak teknologia horien erabileran. Prestakuntza 10 astetan zehar garatzen da eta 40 ordu ditu guztira, aurrez aurreko saioak, online eskolak, tutoretzak eta eguneratze-saioak uztartuz. Formatu horri esker, eskuratutako ezagutzak kasu eta behar profesional zehatzetara eraman daitezke, eta prozesuan zehar esperientziak partekatu. -
KSIen lehiakortasuna indartzeko AA
AA Sortzailearen etorrerak aukerak ekartzen ditu, baina baita erronka berriak ere, hain zuzen ere ezagutzarekin, sormenarekin eta edukiak sortzearekin lan egiten duten industrientzat. Testuinguru horretan, horrelako ekimenek profesionalei, estudioei, agentziei eta kultura-erakundeei agertoki berri honetara egokitzen eta haren aukerak baliatzen laguntzea dute helburu, beren lana bereizgarri egiten duenari uko egin gabe. Horrela, programak eremu teknikotik haratago doazen gaitasunetan jartzen du arreta: pentsamendu kritikoa, sintesirako gaitasuna, sormen estrategikoa, erabakiak hartzeko gaitasuna eta aldaketara egokitzeko ahalmena. Eraldatzen ari den ingurune profesional batean gero eta garrantzi handiagoa hartzen ari diren trebetasunak. -
Esperimentatzea, lan egiteko modu berriak aurkitzeko
Erantzun itxiak eskaintzea baino, programa honek AArekin esperimentatzea, baliogarriak diren erabilerak identifikatzea eta eguneroko lanean txertatzeko norberaren irizpideak garatzea proposatzen du. Ikuspegi horrek kultura- eta sormen-industrien egungo erronka nagusietako bati erantzuten dio: berrikuntza teknologikoa txertatzea, nortasuna eta erabakitzeko gaitasuna galdu gabe.
